Willemstad  -  Ayera anochi Ofisina Sentral di Statistiek a inisia e proyekto di Senso 2023.

Esaki a tuma lugá na Wilhelminaplein, kaminda a organisá un enkuentro sosial pa e personanan ku a yuda ku e organisashon i e enkuestadónan ku ta bai start djasabra awor 2 di sèptèmber ku e konteo.

Direktor di CBS Sean de Boer a motivá e enkuestadónan den su speech, enfatisando ku e trabou su meta ta entre otro pa Kòrsou tin datonan aktualisá ku nos tur por hasi uso di dje unabes publiká e resultadonan.

Na final di e programa tur presente a kana bai Emmabrug unda por a mira e lusnan di  e brùg reflehando e kolónan di Senso23, esta un kombinashon di oraño ku lila. Ademas riba henter e brùg tin bandera ku logo di Senso23, pa animá pueblo di Kòrsou pa duna su partisipashon na e konteo total aki.

Senso ta kuminsá 2 di sèptèmber i ta kontinuá te ku 20 di òktober. Tin 740 enkuestadó ku lo bai kana rònt Kòrsou pa konta tur hende i bibienda, pero tambe hasi e habitantenan di e kas di famia pregunta tokante e situashon sosial i demográfiko di e miembronan di e kas.

CBS ta garantisá e anonimidat di tur informashon ku kolektá durante di Senso23. Enkuestadónan a firma un klousula ku ta indiká ku nan tambe ta kai bou di Lei di Statistik. Mas informashon di e kontenido di e Lei di Statistik por haña riba e wepsait di CBS, esta www.cbs.cw. Por rekonosé tur enkuestadó di Senso na e chaleko blou ku logo di SENSO, huntu ku su ‘badge’  ku logo di CBS i di Senso. E tin tambe e firma ofisial di director di CBS.

Pa verifiká ku sigur ku e ta un enkuestadó di CBS, por scan e QR Code di e  ‘badge’ di bo enkuestadó ku bo selular. Si bo no por scan e QR code, bo por  yama CBS tambe pa verifiká si e persona en bèrdat ta un enkuestadó di CBS. Pa tur esakinan, por yama òf app CBS na 839 2300 of 520 2227.

CBS ta konta ku kada miembro di komunidat lo koperá pa hasi Senso23 tambe unu eksitoso. Pa e motibu aki CBS ta yama un i tur pa duna aporte kompleto, ya asina nos por sa kon nos ta.