Konsepto i definishon

Un unidat doméstiko por konsistí di un solo persona ku ta biba riba su mes òf mas persona ku ta biba huntu. Nos ta traha a base di e konsepto di “dwelling unit” (unidat di bibienda). Segun e konsepto akí, un unidat doméstiko ta konsistí di tur persona ku ta kompartí e mesun unidat di bibienda (lugá di biba). Esei ta asina, asta si bo por distinguí mas ku un unidat familiar den e mesun unidat doméstiko. E konsepto akí ta basá riba e punto di salida ku asina tin hende ta biba huntu den e mesun bibienda, mester tin un tipo di kompromiso mutuo tokante kon ta kubri kosto di bida (por ehèmpel, pago di gastu di awa i koriente) òf kon ta mantené e bibienda (por ehèmpel, fèrfmentu òf reparashon di e kas).

E deskripshon akí ta nifiká ku kada unidat doméstiko ta mará na un bibienda so (un unidat doméstiko pa kada bibienda).

Algun partikularidat:

•Hende ku ta biba den e unidat di bibienda pero kompletamente independiente di e otronan (manera studiante òf migrante ku ta hür kamber apart den un kas) mester yena un formulario apart. Pa por bisa ku un hende ta biba “kompletamente independiente di e otronan”, e mester ta paga su sèn di hür direktamente na e persona ku ta hür e espasio kuné. Pa determiná si un hende ta kai den e kategoria akí, mester hasi e persona e siguiente preguntanan: “Bo ta hür un kamber den e kas?” i “Bo ta paga bo sèn di hür direktamente na e persona ku ta hür e kamber ku bo?'

Importante:

•Den kaso di un persona ku ta keda kambia di adrès i ku, p'esei no ta un miembro fiho di un unidat doméstiko, Senso ta kont'é komo parti di e unidat doméstiko ku, en efekto, e ta formando parti di dje na momento ku e Senso ta tuma lugá.

•Hende ku, na momento di e Senso, ta kedando na un bibienda kolektivo (kas di hende grandi, internat, prizòn, etc.), no ta ser kontá komo parti di e unidat doméstiko. Ta konta nan komo habitante di e bibienda kolektivo kaminda nan ta kedando.

•Yu ku ta studiando den eksterior no ta ser kontá komo parti di e unidat doméstiko.

Un bibienda ta un edifisio, konhunto di edifisio òf parti di un edifisio konstruí di kualke tipo di material i diseñá òf remodelá pa un unidat doméstiko por biba aden. Ku otro palabra, un bibienda habitá ta nifiká un bibienda kaminda un unidat doméstiko ta biba temporal- òf permanentemente.

Ehèmpel 1.

Un hende ta hür un kamber den un kas serka un famia. Si e hende ei ta paga su hür di kamber direktamente na e persona ku ta hür e kamber kuné, e mester yena un formulario apart.

Ehèmpel 2.

Tin tres studiante ta biba den un kas.  Den kaso ku            tur tres ta paga nan hür di kamber direktamente na e persona ku ta hür un espasio ku kada un, kada un di e studiantenan akí lo mester yena e formulario di Senso apart.

Ora nos papia di un “bibienda”, den práktika nos ke men un bibienda privá/no kolektivo. Banda di e tipo di bibienda akí, tin tambe asina yamá “bibienda kolektivo”.

Un bibienda di fakansi ta sirbi komo residensia, pero na un manera partikular. Partikular debí ku ta temporalmente so hende ta biba den un bibienda asina. Ku otro palabra, e kas no ta sirbi komo residensia permanente sino komo akomodashon turístiko. Pa e motibu ei, bibienda di fakansi no ta konta komo bibienda.

Mas o ménos meskos ta konta pa wikènthùis. E kasnan akí ta sirbi un propósito rekreativo. Nan no ta sirbi komo residensia permanente. P'esei mes, e kasnan akí tampoko no ta konta komo bibienda.

Bibienda kolektivo ta, por ehèmpel, instituto manera kas di hende grandi, kas di kuido, internat, sentro di akohida pa mama yòn. instituto sikiátriko, instituto pa adikto i prizòn.

Tin entrevistadó kontratá spesialmente pa hasi konteo di e habitantenan di bibienda kolektivo.

Persona number 1 ta e persona den e unidat doméstiko ku por duna mas tantu informashon tokante e unidat doméstiko. Ademas, e miembronan di e unidat doméstiko mester a skoh'é komo Persona number 1.

E intenshon ta pa, mas tantu posibel, kada miembro di e unidat doméstiko mes kontestá e preguntanan ku ta tokante su persona (pregunta personal). Ademas di pregunta personal, tin tambe pregunta tokante e bibienda i e ambiente rònt di e bibienda.  Persona number 1 mester kontestá e preguntanan ei.

Famia: e miembronan di e unidat doméstiko ku ta afiliá na otro te na sierto grado, sea pasobra nan ta famia di sanger òf via adopshon, òf a base di matrimonio òf kombibensia registrá; ku otro palabra, tur ku ta famia di otro, sea di sanger òf parentá (a base di matrimonio).

Pues, “unidat doméstiko” i “famia” ta konseptonan diferente.

- Miembronan di un unidat doméstiko por ta forma un famia. Pero no ta tur ora esei mester ta e kaso.

- Por ta tambe ku den un unidat doméstiko niun di e miembronan ta famia di otro.

Den e Senso akí, ta konta yu di kriansa i yu adoptá komo yu (‘natural’) di e pareha. Tata di kriansa, mama di kriansa i ruman muhé di kriansa tambe ta ser kontá komo tata, mama i ruman muhé (‘natural’).

Un skol di den dia ta un instituto di enseñansa kaminda ta duna lès diariamente den dia. Ta trata akí di enseñansa di “tempu kompleto”. Ehèmpel di skol di den dia ta: Skol di Fundeshi, Enseñansa Spesial i enseñansa avansá: VSBO, HAVO, VWO.

Profeshon ta referí na e tipo di trabou ku e persona ta hasi aktualmente. Pues, “profeshon” no ta referí na loke e persona a studia òf siña p’e. Un hende por ta diplomá den filosofia, pero traha komo sekretaria; den e kaso ei, su profeshon (aktual) ta sekretaria.

• E habitantenan ku e Senso  akí mester haña dato di dje (e “grupo di enfoke') ta:

    Tur hende ku tin 1 aña òf mas bibá na Kòrsou òf ku tin intenshon di pasa 1 aña òf mas bibando na Kòrsou.

• E personanan ku ta forma parti permanente di e unidat doméstiko aki (e hendenan di kas) mester yena e formulario di Senso (di prueba)/ ser entrevistá.

• Si tin hende ku ta bibando temporalmente ku un unidat doméstiko i nan ta ser konsiderá parti di e unidat doméstiko, nan mester partisipá na e Senso (di prueba) den kaso ku nan tin un aña òf mas bibá na Kòrsou òf tin intenshon di pasa 1 aña òf mas bibando na Kòrsou.