Regla (Trabou den vèlt)

Algun punto di atenshon pa ora ta atendé ku miembro nan di unidat doméstiko na momentu ku aserka pa entrevista;

Introdusi bo mes (ku nomber i fam i ku bo ta enkuestdo di CBS), mustra bo bedge. Bo mester bisti e bedge semper visibel riba bo paña.
Bo por splika bon kla ta ki tipo di enkuesta bo ta bin hasi.
Mustra amabilidat, kortesia i pasenshi. Den mayoria di kaso, esei ta duna e mihó resultado.
Laga e persona komprondé bon ku e datonan lo ser prosesá na un manera anónimo. CBS no mag di duna ningun datos di miembro nan di e unidat domestiko bishita na nigun tersera persona o instansia.
Lesa tokante di esaki akinan
Un entrevista di un unidat doméstiko di 2 adulto i 2 menor di edat lo dura ± 40 minüt.
Sòru pa bo pañanan ta na òrdu i no keda ku bo brel di solo of pechi bistí ora bo ta tene un entrevista a base di e aserkamentu.
Paga bo selular òf pon’é riba ‘silent’. Durante un entrevista, bo no tin mag di hiba kòmbersashon personal na selular durante entrevista.
Purba pa semper abo, komo e entrevistadó, ta esun ku ta dirigí kon e entrevista ta desaroyá. Bo por topa hende ku ke duna bo tur tipo di informashon adishonal òf kòmbersá ku bo riba tur tipo di tópiko. Tin di nan lo tin kritiká tokante e manera ku e investigashon ta organisá, òf tokante gobièrnu òf CBS. Purba di keda mas neutral posibel i evitá mas tantu posibel di duna bo opinion personal. Splika e persona ku bo mester tene e entrevista manera e instrukshonnan ta bisa.
Wak pa semper abo keda korekto, asta si e partisipante no ke kooperá. Eksperensia ta mustra ku e entrevistadónan ku ta haña mihó resultado ta esunnan ku ta papia na un manera amabel i simpátiko i sa kon laga e persona sintié kómodo. Ademas, laga e persona komprondé bon ku CBS ta asumí un posishon independiente for di e otro instansianan di gobièrnu.
Kisas un partisipante ta preferá pa e otro miembronan di su famia no ta presente ora bo ta entrevist’é. Den un kaso asina, purba di tene e entrevista kuné na un lugá apart (per ehempel por sinta den porch).
Paga bon tinu pa, den tur e entrevistanan, bo hasi tur pregunta ku mester ser hasí, te na e último. Paga tinu tambe pa bo no kambia e formulashon ni e sekuensia di e preguntanan ya ku, si bo hasi kambio, e pregunta por zona diferente i pone ku e partisipante ta duna un kontesta ‘inkorekto.
No duna niun opinion tokante e kontestanan di e partisipante, ni ku palabra ni ku reakshon no verbal. E partisipante mester sinti ku e por duna informashon sin ku hende ta forma un opinion tokante loke e ta bisa. Ku ‘reakshon no verbal’ nos ke men, por ehèmpel, un ekspreshon di asombro òf di deskonfiansa.
Laga e partisipante mes kontestá tur pregunta di kuminsamentu te fin, asta si bo tin sigur ku bo sa e kontesta. Maske den e parti final di e entrevista, lo tin hopi kontesta ku kisas bo mes por kontestá di antemano, nunka bo no mag kontestá p’e! Si bo warda i laga e partisipante mes kontestá, esei ta mustra mas rèspèt p’e tambe.
Ekspresá e preguntanan presis manera nan ta formulá den e kuestionario. Si e partisipante no komprondé, ripití e pregunta papiando mas trankil. Si ainda e partisipante no a komprondé e pregunta, e ora ei bo por duna un splikashon. Sin embargo, no hasi esei na un manera ku ta dirigí e partisipante den direkshon di un tipo di kontesta spesífiko. Tene e pregunta neutral.
Nunka abo komo entrevistadó no mester lesa e opshon ‘no sa’ na bos haltu, maske e ta aparesé den e posibel kontestanan. Si tòg e partisipante bisa ku e ‘no sa’ i e opshon ei ta aparesé tambe komo un di e kategorianan di kontesta, e ora ei bo ta marka ‘no sa’.
Si e informashon ku e partisipante duna no ta kompletamente kla pa bo komo entrevistadó, ta mihó si bo hasi un òf mas pregunta adishonal, por ehèmpel: ‘Kon Mener/Señora ke men ku ...?’ òf ‘Ku otro palabra, Mener/Señora ke bisa ku ...?’ pa asina bo por haña klaridat. Den kaso ku e partisipante duna informashon kontradiktorio, tambe e entrevistadó mester hasi pregunta adishonal i kisas referí na e kontesta ku e partisipante a duna anteriormente. Por ehèmpel, por sosodé ku, promé, un hende ta bisa ku e no tin trabou i despues, ku e ta un ‘empleado den servisio fiho’.
Ensayá na kas pa bo por kòmbersá na un manera agradabel i ku fluides, prinsipalmente den bo introdukshon. Familiarisá bo mes bon ku e kuestionario promé ku bo kuminsá kontaktá e unidatnan doméstiko.
Na fin di e entrevista, no lubidá di gradisí e partisipantenan pa nan kooperashon! Sin nan kooperashon, CBS no por disponé di e datonan nesesario!
Bo por menshoná ku, na su debido tempu, lo publiká e resultadonan di e investigashon den e medionan di komunikashon i via e wèpsait di CBS: www.cbs.cw