Importansia di senso
Di kon ta importante pa tene un senso kada 10 aña na Kòrsou?
Pa formulashon i planifikashon di maneho i den kuadro di atministrashon públiko
Ta tene senso di poblashon, na promé lugá, pa por optené dato esensial pa formulashon i planifikashon di maneho i den kuadro di atministrashon públiko. Informashon tokante tamaño, distribushon i karakterístika di poblashon di un pais ta esensial pa por deskribí i evaluá e pais su situashon ekonómiko, sosial i demográfiko, i pa formulá maneho i programa adekuá pa fomentá bienestar di e pais i di su poblashon. Un senso di poblashon ta produsí dato statístiko básiko na nivel di e pais den su totalidat i di kada un di su aera geografiko of barionan.
Ta produsí e datonan akí di tal manera ku por kompará nan ku dato di otro senso di poblashon. P’esei, senso di poblashon por hasi un aporte importante na e proseso di planifikashon en general i na maneho di e pais. Senso di poblashon ta asta sirbi komo base di e sistema di statistik nashonal di hopi pais. Senso ta suministrá dato di referensia importante pa formulashon i planifikashon di maneho, pa maneho i evaluashon di aktividat den kuadro di e programanan di gobièrnu relashoná ku un variedat amplio di aplikashon sektoral, i pa por monitoriá progreso riba tereno di desaroyo en general.
Ademas, den e último añanan, mas i mas bo ta mira ku gruponan di sosiedat sivil ta usa dato di senso pa evaluá bon gobernashon. Komparando un senso ku esun siguiente, un siudadano sin formashon spesialisá tambe por monitoriá kon e gobièrnu elegí demokrátikamente ta presta riba tereno di hisa nivel di bienestar di e siudadanonan, basta e resultadonan di senso bira ampliamente disponibel na tempu.
Den kuadro di programa, senso di poblashon ta suministrá un kantidat di informashon statístiko indispensabel, manera dato demográfiko i informashon tokante unda hende ta biba i tokante kuestion sosioekonómiko, pa uso lokal, nashonal, regional i internashonal. Por ehèmpel, senso di poblashon ta suministrá e informashon ku ta sirbi komo base pa hasi kalkulashon i proyekshon i tambe análisis demográfiko i sosioekonómiko detayá di e poblashon. Tambe, e datonan di senso ta sirbi pa kalkulashon di indikadó sosial, spesialmente indikadó ku kisas no ta ser opservá ku frekuensia debí ku nan ta midi fenómeno ku ta kambia lentamente atraves di tempu, i tambe indikadó ku ta nesesario pa área òf grupo mas chikitu di e poblashon.
Pa uso den kuadro di investigashon
Ademas di ta sirbi pa sierto meta spesífiko den kuadro di maneho di gobièrnu, senso di poblashon ta suministrá dato indispensabel pa por hasi análisis i kalkulashon sientífiko tokante komposishon, distribushon i kresementu di poblashon den pasado i proyekshon di e sifranan akí pa futuro.
Algun pregunta di interes sientífiko ku ta importante pa kresementu i maneho di industria i komèrsio ta, por ehèmpel: kon e konsentrashon di hende ku ta biba den área urbanisá òf den kunuku ta kambiando, den ki área tin urbanisashon ta tumando lugá, kon e poblashon ta distribuí geográfikamente (kategorisá a base di variable manera profeshon i nivel di enseñansa), ki kambio tin den struktura di e poblashon pa loke ta sekso i edat, ki diferensia tin entre diferente grupo di e poblashon pa loke ta mortalidat i fertilidat, pero tambe kua ta e karakterístikanan ekonómiko i sosial di e poblashon i di su forsa laboral.
Pa uso relashoná ku negoshi, industria i labor
Banda di e usonan ya menshoná, individuo i instituto riba tereno empresarial, industrial i di labor ta usa senso na hopi otro manera importante. Pa por hasi proyekshon konfiabel di e demanda di parti di konsumidó pa e variedat kada bes mas grandi di produkto i servisio, tin mester di informashon eksakto tokante tamaño di e poblashon den e supdivishonnan teritorial di un pais i tokante kon e poblashon ta distribuí, a lo ménos pa loke ta trata sekso i edat, ya ku e karakterístikanan akí tin un influensia grandi riba demanda pa bibienda, mobilario, kuminda, paña, fasilidat di rekreo, artíkulo médiko, etsétera.
Fuera di esei, por usa senso pa generá dato statístiko tokante e tamaño i karakterístikanan di e forsa laboral ku lo tin mester pa por produsí i distribuí e produkto- i servisionan menshoná, konforme e normanan statístiko di Organisashon Internashonal di Labor. E tipo di dato akí tokante e forsa laboral ku ta disponibel lokalmente por ta importante na momento di disidí unda lo establesé un negoshi i kon e mester ser organisá.
Pa uso komo "steekproefkader" pa enkuesta
Senso di poblashon ta e fuente prinsipal di dato pa produsí un asina yamá "steekproefkader" pa e enkuestanan ku ta tene den e añanan ‘intersensal’ (entre un Senso i esun siguiente) riba un gran kantidat di tópiko, manera forsa laboral, fertilidat i migrashon.
Uso pa suidadano
Pa e suidadano ta importante pa por tin un bista kla di e situashon di su komunidat. E por atkirí e bista aki entre otro dor di e sifranan senso ta pone disponibel. Alabes esaki ta hasi posibel pa e suidadano por ehersé un sierto grado di kontròl riba e maneho ku gobièrnu ta hiba.