Kòrsou, meskos ku hopi otro pais, tin un organisashon sentral di statistik, enkargá pa suministrá tur informashon statístiko ku Pais tin mester:

Landsbesluit Organisatie en Taakstelling Centraal Bureau voor de Statistiek (CBS) (Statistiekenwet PB. 2011, no.17) ta stipulá e siguiente tareanan pa CBS:

Hasi investigashon statístiko pa instituto gubernamental, sientífiko i privá, i (laga) publiká e informashon statístiko i demas produktonan statístiko generá.

Fuera di esei, sea kontra pago òf nò, CBS por hasi investigashon riba enkargo di tersero i duna servisio na tersero, basta esei no perhudiká kompetensia riba merkado.

CBS a bini ta funshoná komo un ofisina independiente for di 1980, aunke nos historia ta muchu mas largu. Atraves di e añanan ei, nos a akumulá konosementu statístiko sumamente amplio riba práktikamente tur área di interes sosial, manera:

merkado laboral

entrada i distribushon di entrada

kas di famia i bibienda

preis i kompetensia

negoshi

gobernashon

importashon/eksportashon i balansa di pago

kuenta nashonal

enseñansa

Ademas, CBS tin eksperensia amplio den realisashon di proyekto pa tersero, i demanda pa nos servisionan riba e tereno akí ta krese konstantemente.

Nos ta reuní informashon mediante investigashon propio, pero tambe for di fuente atministrativo eksistente. Hopi bes, ora ta trata di informashon for di fuente eksistente, mester proses’é promé, pa pon’é den un formato ku ta kuadra ku nos propio datonan.

CBS ta kompilá dato statístiko di balor práktiko usando un aserkamentu integrativo. Esei ta nifiká ku nos ta presentá e informashon di tal manera ku por kompar’é ku otro informashon ku ta relashoná kuné, i ku ademas por us’é den un sistema kaminda ta kombin’é perfektamente ku dato di otro fuente. Esei ta posibel solamente si kompilá tur informashon na e mesun sistema (kuadro di integrashon) i usando e mesun prosedimentu-, klasifikashon- i definishonnan.

CBS a adoptá e aserkamentu integrativo akí komo su maneho di prosesamentu di dato statístiko. P’esei, por konta ku tur informashon ku CBS produsí ta kumpli ku e eksigensianan di e aserkamentu integrativo, te asina leu ku ta posibel. Pa garantisá ku ta usá e aserkamentu korekto, CBS ta traha a base di dos kuadro di integrashon prinsipal: Senso (pa loke ta trata dato sosio-demográfiko) i e Kuentanan Nashonal (pa dato ekonómiko i finansiero).

P’esei, semper nos produktonan ta komparabel ku otro, inkluso ku informashon di promé òf despues den tempu. Debí ku generalmente e prosedimentu- i definishonnan usá ta konforme norma internashonal, e informashon produsí ta komparabel ku informashon produsí den eksterior tambe.